បាងកក៖ ក្រសួងសុខាភិបាលថៃ នៅថ្ងៃព្រហស្បតិ៍នេះ បានបង្កើនកម្រិតប្រកាសអាសន្នកូវីដ-១៩ ពី៣ទៅ៤ដើម្បីឆ្លើយតបទៅនឹងការរីករាលដាលយ៉ាងឆាប់រហ័សនៃប្រភេទអូមីក្រុង នៅក្នុងប្រទេស។

ការព្រមានកម្រិតទី៤ នាពេលនេះគឺសំដៅលើការបិទតំបន់ដែលងាយនឹងឆ្លងមេរោគ ការកាត់បន្ថយការធ្វើដំណើរ និងការជួបជុំគ្នារវាងខេត្ត។ លេខាធិការអចិន្ត្រៃយ៍នៃក្រសួងសុខាភិបាលថៃលោក Kiattiphum Wongrajit បានថ្លែងក្នុងសន្និសីទសារព័ត៌មាននៅភូកេតថា ថៃមានកម្រិតក្នុងការប្រកាសអាសន្នចំនួន៥កម្រិត ដែលកម្រិតទី៥ សំដៅលើបម្រាមគោចរ ការចល័តដ៏តឹងរ៉ឹង ការគ្រប់គ្រងការប្រមូលផ្តុំសាធារណៈ និងការដាក់ឱ្យនៅដាច់ពីគេសម្រាប់អ្នកដំណើរទាំងអស់។

ថៃបានបញ្ជាក់ពីករណីឆ្លង COVID-19 ថ្មីចំនួន ៥ ៧៧៥ករណី ក្នុងរយៈពេល ២៤ម៉ោងចុងក្រោយ ដែលជាការកើនឡើងយ៉ាងខ្លាំង។

លោក Kiattiphum បានកត់សម្គាល់ថាទោះបីជាការឆ្លងមេរោគ អូមីក្រុង ភាគច្រើនមានលក្ខណៈស្រាលក៏ដោយ សាធារណជនចាំបាច់ត្រូវមានការប្រុងប្រយ័ត្នបន្ថែមដើម្បីការពារការកើនឡើងនៃករណីដែលអាចដាក់សម្ពាធយ៉ាងខ្លាំងលើប្រព័ន្ធថែទាំសុខភាព។

លោក Kiattiphum ក៏បានជំរុញដល់សាធារណជនឱ្យទៅចាក់វ៉ាក់សាំងឱ្យបានឆាប់តាមដែលអាចធ្វើទៅបាន និងធ្វើតេស្តរហ័សឱ្យជាប្រចាំដើម្បីរកឃើញការឆ្លង និងទទួលបានការព្យាបាលទាន់ពេល៕